Обвинителката Ленче Ристоска поднесе оставка од функцијата јавен обвинител откако новиот републички јавен обвинител Ненад Савески ја тргна од предметите „Талир“ што ги водеше против актуелната владејачка ВМРО-ДПМНЕ.

Кулминација на опструкциите врз Ристоска била одлуката на Савески, но и отфрлањето на нејзината претставка пред Советот на јавни обвинители која ја поднесе откако премиерот ја нарече „медиокритет со политичка матрица“, но ниту обвинителот, ниту Советот не препозна притисоци.

-Оваа недела Советот на јавни обвинители ја отфрли мојата претставка за напад врз мојот интегритет и самостојност, а државниот јавен обвинител донесе одлука за повлекување на овластувањата за застапување во клучни предмети во завршна фаза. Сметам дека овие одлуки сериозно ја ослабуваат позицијата на јавното обвинителство и носат конкретни ризици за исходот на предмети кои таргетираат висока корупција и криминал. Овие постапки се во директна спротивност со визијата за која се залагам, а тоа е обвинителство кое работи надвор од политички влијанија, ги штити своите професионалци и го брани јавниот интерес доследно и без селекција. Бидејќи не гледам простор за работа во согласност со тие принципи, денес поднесов оставка од функцијата јавен обвинител. Искрена благодарност на сите кои ја препознаа и поддржаа мојата посветеност и борба – вели Ристоска..

Таа се осврнува и на својата досегашна кариера во која работеше на високопрофилни случаи, критиките кои ги упатуваше за состојбите во правосудството, но и нејзината кандидатура за раководна позиција во Обвинителството.

-Јавнообвинителската функција секогаш сум ја поимала како позив и можност за придонес кон подобрување на системот, општеството и пред сè животот на граѓаните. Затоа во текот на мојата кариера особен предизвик ми претставуваше работата на случаи кои најдиректно влијаат врз дерогирањето на општествените вредности и принципи. Работењето на високопрофилни случаи создава и високопрофилни непријатели — такви кои ги користат своите моќ, влијание и конекции за да избегнат одговорност и да ве оттргнат од вашата намера. Тоа подразбираше опструкции на различни нивоа, институционални и лични. Низ годините бевте сведоци на многу од тие случувања: влијание врз сведоци, вршење притисоци, менување на законски решенија, чување предмети во фиока и застарување на предмети. Сето тоа не ме спречи да опстојам во моите заложби, па јавно ги критикував состојбите во правосудството без оглед на општествено-политичкиот контекст и без калкулации за последиците по мојата кариера. Сите тие напори сакав да ги заокружам од раководна позиција преку мојата кандидатура за државен јавен обвинител, со јасна визија, акумулирано знаење и изградена отпорност спрема влијанија и притисоци. Верував дека е дојдено времето за институција чија водилка ќе биде јавниот интерес, борбата против корупцијата и криминалот и заштитата на правата на граѓаните – додава Ристоска.

Советот испрати порака дека обвинителите се оставени сами да се справуваат со притисоци од центри на моќ, вели Ристоска