Халк Хоган, една од најголемите ѕвезди во историјата на професионалниот кеч и човекот кој ја претвори Светската федерација за кеч (World Wrestling Entertainment) во глобален феномен, почина денеска на 71-годишна возраст.

Според информациите на Ти-ем-зи, во неговиот дом во Клирвотер, Флорида, била повикана итна помош поради срцев удар. Медицинскиот тим пристигнал на лице место и го однел со носилка во амбулантно возило.

„Светската федерација за кеч со голема тага ја пренесува веста дека членот на Куќата на славните, Халк Хоган, почина. Како една од најпрепознатливите фигури во поп-културата, Хоган ѝ помогна на федерацијата да добие глобално признание во осумдесеттите години. Федерацијата изразува искрено сочувство до неговото семејство, пријателите и фановите“, се наведува во соопштението објавено на мрежата Икс.

WWE is saddened to learn WWE Hall of Famer Hulk Hogan has passed away.

One of pop culture’s most recognizable figures, Hogan helped WWE achieve global recognition in the 1980s.

WWE extends its condolences to Hogan’s family, friends, and fans.

— WWE (@WWE) July 24, 2025

Хоган, со вистинско име Тери Болеа, се прослави во осумдесеттите години со својот препознатлив лик на патриотски херој преку феноменот „Халкаманија“. Со својата харизма и енергија, ја трансформираше Светската федерација за кеч во водечка организација за боречка забава на светско ниво.

Роден во Огаста, сојузната држава Џорџија, во 1953 година, Хоган имаше две деца, Брук и Ник, од првиот брак со сопругата Линда, со која се разведе во 2007 година. Во 2010 година се ожени со Џенифер Мекданиел, но и овој брак заврши со развод во 2022. Во 2023 година, Хоган стапи во брак со Скај Дејли.

Минатата година, во јули 2024, се појави на Националната конвенција на Републиканската партија, давајќи поддршка на претседателската кампања на Доналд Трамп.