Поранешниот фудбалер на Манчестер Јунајтед и освојувач на европската титула во 1999 година, Двајт Јорк, повеќе не е селектор на репрезентацијата на Тринидад и Тобаго, со што заврши неговиот прв тренерски ангажман во кариерата.

Јорк ја презеде националната селекција пред околу 17 месеци со цел да обезбеди пласман на Светското првенство. Задачата на прв поглед изгледаше полесна, особено поради проширувањето на бројот на учесници, а дополнително квалификациите беа олеснети и со фактот што домаќините на турнирот, Мексико, САД и Канада не настапуваат во квалификацискиот циклус.

Сепак, селекцијата на Тринидад и Тобаго не успеа да стигне до посакуваниот пласман. Клучен се покажа натпреварот против Јамајка во ноември, кој заврши без победник и практично ги згасна надежите за настап на Мундијалот.

По неуспехот, Јорк добил понуда да остане на селекторската позиција, но со намалена плата. Легендарниот напаѓач ја одбил таа опција и решил да ја напушти функцијата.