Изминатата ноќ НБА ги објави стартните петорки за претстојниот „Ол-стар“ натпревар, при што изборот е направен врз основа на настапите во првата половина од сезоната. За разлика од претходните години, покрај гласовите на навивачите, овојпат свое влијание имаа и кошаркарите и тренерите.

Овогодишниот „Ол-стар“ спектакл е закажан за 15 февруари и ќе се одржи во Лос Анџелес, во „Интуит Доум“, новоотворената арена на ЛА Клиперс.

Источната конференција ќе ја предводат Јанис Адетокумбо, Џејлен Брансон, Кејд Канингем, Тајрис Макси и Џејлен Браун. За Канингем, Макси и Браун ова ќе биде прво појавување во стартната петорка на „Ол-стар“ натпревар, што претставува значајно признание за нивните одлични сезони.

На Западот, пак, меѓу стартерите се најдоа Никола Јокиќ, Лука Дончиќ, Шеј Гилџес-Александер, Стеф Кари и Виктор Вембањама. Младиот Французин за првпат е избран во стартната петорка, откако во тесна трка го надмина Ентони Едвардс од Минесота.

Интересно е што Леброн Џејмс за првпат по две децении нема да го започне „Ол-стар“ мечот како стартер, а допрва ќе се знае дали ќе добие место меѓу резервите. Воедно, настапот на Јокиќ останува неизвесен, бидејќи српскиот ас има проблеми со повреда, па не е познато колку во Денвер ќе сакаат да ризикуваат.