ЛДП го предлага Пенов за нов министер за локална самоуправа
Партијата ЛДП сопшти дека Централниот одбор на синоќешната седница го прифатил предлогот на Извршниот одбор за започнување со подготовки за одржување на редовното Собрание на партијата. Била разгледана и оставката на министерот за локална самоуправа Горан Милевски, а бил прифатен предлогот Ристо Пенов да биде избран и именуван за иден министер на оваа позиција во Владата.
– Централниот одбор се заблагодари на досегашниот негов ангажман, на успешното менаџирање со министерството и на придонесот за регионалниот развој на државата – велат од ЛДП.
Како што додаваат од партијата согласно Статутот на ЛДП се формира организационен одбор во чиј состав се изгласани Боби Мојсоски, Димитар Ванчов, Билјана Аврамоска – Ѓореска, Дејанчо Цветановски, Валентин Груевски и Ивица Тодоровски.
До Конгресот ќе се одржат уште две седници на ЦО со цел подготовка на истиот, а на следниот состанок на ЦО кој се очекува да се одржи следната недела ќе бидат разгледани и предлог датуми за одржување на Конгресот.