Кумановската болница остана без возила за итна помош по синоќешната сообраќајка

Фото: EPA-EFE/GEORGI LICOVSKI

Општата болница Куманово остана без возила за транспорт и итна помош, откако синоќа во сообраќајка во Скопје, при транспорт на пациент од Куманово, се преврте едно од возилата. Другите две возила се на сервис, а за уште едно се очекува да заврши тендерската постапка и да биде набавено.

Поради ваквата ситуација, раководството на болницата ќе мора да позајмува амбулантно возило од скопската Итна помош или од друго место, бидејќи во моментов нема ниедно.

Директорката на болницата, доктор Снежана Захариева, за „Слободен печат“ вели дека во амбулантното возило кое синоќа се преврте во Скопје, имало кардиолошки пациент којшто е пренесен на Клиниката за кардиологија при Клиничкиот центар „Мајка Тереза“, а со него како придружба упатени биле и една медицинска сестра и возачот. Медицинската сестра е на опсервација поради повреди на раката.

На 21.04.2023 во 23.20 часот било пријавено дека во Скопје на крстосницата од бул.“Климент Охридски“ и ул.“Св.Кирил и Методиј“ се случила сообраќајна несреќа помеѓу патничко моторно возило “фолксваген туран“ со скопски регистарски ознаки управувано од Ч.Д.(57) од Скопје и возило “мерцедес“ со кумановски регистарски ознаки сопственост на Итна медицинска помош управувано од В.С.(23) од Куманово.

Во несреќата со тешки телесни повреди се здобил возачот Ч.Д., а со телесни повреди се здобиле возачот на возилото од Итна медицинска помош, сопатничката од истото возило А.К.(40) и лицето кое се превезувало како пациент Ж.Ц.(72) двајцата од Куманово констатирани во Комплексот клиники “Мајка Тереза“ и Градската општа болница “Св.Наум Охридски“. Извршен бил увид од увидна екипа од СВР Скопје.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот