Едно семејство од Тексас остана во шок откако доби повик дека нивното куче, кое беше исчезнато речиси две години, е пронајдено живо и здраво на другата страна од Соединетите Американски Држави.

Коко, кучка од расата минијатурен шнауцер, била пронајдена повеќе од 1.600 км од домот во Глен Хајтс, Тексас. Полицијата во Кларк, Њу Џерси, објави дека Коко била забележана како талка во близина на трговскиот центар Кларк Комонс на 4 март, што ги натера жителите да се јават во полиција.

Полицискиот службеник Ник Курус одговорил на повикот и ја однел изгубената кучка во станицата. Таму, полицајците пронашле информации од служба за пронаоѓање домашни миленици и ги искористиле за да го добијат името и телефонскиот број на последниот регистриран сопственик. Кога Курус се јавил, семејството не можело да верува дека Коко е пронајдена. Според полицијата, тие биле „шокирани“ од веста и рекле дека Коко исчезнала пред две години во Тексас.

Семејството веднаш почнало да планира патување во Њу Џерси за повторно да го види своето домашно милениче. Во меѓувреме, Коко не завршила во засолниште, туку останала во полициската станица неколку дена.

– Наместо да ја испратат во засолниште, полицајците од Кларк се грижеа за неа во следните три дена – соопшти полицијата.

Ја искапиле, ја нахраниле, ја прошетале и ѝ дадле ќебиња и играчки што ги купиле сами.

Долгата приказна за Коко заврши среќно на 7 март, кога нејзините сопственици дојдоа да ја земат. Средбата беше многу емотивна, а полицијата вели дека штом Коко ја видела својата сопственичка, таа истрчала директно кон неа. Во соопштението се додава дека сопствениците се исклучително благодарни за грижата и сочувството што полицијата од Кларк го покажала кон нивното куче.