Портпаролот на косовската Влада Перпарим Криезиу изјави дека косовскиот премиер Албин Курти нема да учествува на неформалниот состанок на лидерите од Западен Балкан во Тирана и дека за тоа го информирал албанскиот премиер Еди Рама, пренесува Репортерс.
Криезиу како причина за отсуството на Курти го наведе Меѓународниот симпозиум што се одржува денеска во Грција.

„Пред една недела Курти беше поканет од албанскиот премиер Еди Рама на неформален ручек со еврокомесарот Оливер Вархељи во Тирана, каде беа поканети и други лидери од Западен Балкан. Меѓутоа, Курти го информира Рама дека нема да може да присуствува , како што го потврди своето учество пред неколку месеци на конференцијата на Крит, Грција, каде истиот ден, во исто време се одржува панелот за Западен Балкан“, рече Криезиу.

Курти, како што наведе, ќе учествува на Самитот на Берлинскиот процес што ќе се одржи во Тирана на 16 октомври.