Кошаркарската федерација на Македонија вторпат во краток период, парично го казни МЗТ Скопје Аеродром, но овој пат наместо Дисциплинската комисија, која неодамна изрече санкција од 300.000 денари и двегодишна суспензија на директорот Тони Грнчаров, на која веќе се жалеше клубот, тоа го стори комесарот Александар Милојевиќ поради извештајот на делегатот од неодамнешното вечно-дерби во кое „металците“ лесно и убедливо го совладаа Работнички (87:66).

На КК МЗТ Скопје Аеродром му е наложено да плати 8.000 денари поради наводното „неспортско навивање“ на своите навивачи упатено кон тренерот на гостинската екипа Тони Симиќ.

Како и дополнителни 16.000 денари поради истакнување на транспарент, кој, според нивните стандарди, имал навредлива содржина кон „Претседателот на КФСМ“, Перо Антиќ.

– Колку и да не се согласува со причините за изречените казни, МЗТ Скопје стоечки ќе ги прифати санкциите, со надеж дека делегатите и комесарот ќе бидат исто така ревносни во санционирањето на исти и слични работи на средбите кои нашиот тим ќе ги игра на гостинските терени – информираат од КК МЗТ Скопје Аеродром.

МЗТ се жали на казната: Пресудата мора да биде праведна, самиот Антиќ се потпишуваше како небитниот