Екипата на Манчестер Сити во рамките од 35. коло во англиската Премиер лига славеше победа од 0:2 против Нотингем Форест и така ја оправда фаворитската улога.

Домаќините кои се во битка за опстанок денеска немаа шанса против гигантот од Манчестер. Избраниците на Пеп Гвардиола до водство дојдоа по само половина час игра кога Јошко Гвардиол ја погоди мрежата на „Шумарите“.

Вториот гол на 20-тина минути пред крајот беше дело на Ерлинг Халанд, а втора асистенција на натпреварот запиша Де Брујн.

На табелата Манчестер Сити има бод помалку (79) од Арсенал (80) кој денес претходно го победи Тотенхем со 3:2, но „граѓаните“ имаат и натпревар помалку. Ливерпул е зад нив со 75 бода. Од друга страна Нотингем е прв клуб над опасната зона со еден повеќе од Лутон и два од Барнли.