Продуцентот „Баги Комуникации“ го организира концертот „Те носам во себе“, посветен на македонскиот музички маестро Драган Ѓаконовски – Шпато. Концертот ќе се одржи на 31 мај, со почеток во 20 часот, во Мала сала на Филхармонија.

Композитор, диригент и музички аранжер, зачетник на македонската забавна музика кој зад себе остави вистинско звучно богатство, Шпато го нарекуваат македонскиот Бетовен на забавната музика, чии композиции не се само печат на едно време, туку се дел и од нашето современие.

– Драган Ѓаконовски – Шпато, дваесет празни места, па сите други после него. Тој беше гениј… – изјавил Григор Копров.

На концертот ќе се слушнат најубавите композиции на Шпато, а на сцената ќе настапат Мартин Ѓаконовски, еден од најпознатите европски контрабасисти, на тромбон светски познатиот Bart Van Lier, пијанистот Гордан Спасовски, саксофонистот Кирил Кузманов, на тапани Левин Ѓаконовски, како и извонредниот вокалист Џон Илија Апелгрен.