Државната компанија „Национални шуми“ (порано „Македонски шуми“) до крајот на годината ќе прими преку 400 нови работници, а се бараат дрвосечачи (182), дотурачи (95), редачи-утоварачи-истоварачи (51) и шумски работници (81). Огласот е објавен на веб-страницата на јавното претпријатие.

Според објавениот оглас, до 31 декември годинава претпријатието планира да прими на определено време 407 луѓе, а на повикот може да се пријават работници со или без искуство.

Јавното претпријатие за сите позиции нуди плата од 18.000 денари, што е помалку од минималната плата, односно од износот на најмалиот дозволен месечен личен доход за полно работно време во државата.

„Работните задачи за работно место сечач опфаќаат соборување, кроење и изработка на шумски сортименти, за работно место дотурач – пренос на дрвни сортименти, за работното место Редач – Утоварач – Истоварач опфаќа утоварање, растоварање и редење на дрва во шума и во магацин и за работното место Шумски работник опфаќа редење, утовар, растовар на огревно дрво и градежен материјал и други работни задачи. Месечната нето плата за работното место Сечач изнесува 18.000 денари, за работно место Дотурач изнесува 18.000 денари, за работното место Редач – Утоварач – Истоварач изнесува 18.000 денари и за Шумски работник (редач, утовар и пошумување и шумски производи) изнесува 18.000 денари“, се вели во огласот.

Неделно работно време за овие работни места изнесува 40 часа, распоредено во 5 (пет) работни дена од понеделник до петок, од 07 – 15 часот. Работните задачи се извршуваат исклучиво на терен. Огласот трае 15 дена сметано од денот на објавување, односно најдоцна до 15.03.2023 година, а изборот ќе се изврши согласно законски пропишаните рокови.

Според достапните информации од скорешни новинарски написи, јавното претпријатие „Национални шуми“ има дури 3.000 вработени, а тоа, како и други големи јавни претпријатија кои се под капата на државата, низ годините често беше наведувано како легло на масовни партиски вработувања.