Претседателот на Судскиот совет, Киро Здравев вели дека се наоѓа во законодавниот дом, иако претходно координаторот на пратеничката група на ВМРО-ДПМНЕ, Никола Мицевски, обвини дека е срамно што тој не присуствува на седницата на која се разгледува изборот на судијката Добрила Кацарска за уставен судија, што е предлог на Советот.

– Јас сум во Собрание. Повеќе од очигледно е дека се крши уставниот принцип на поделба на власта на судска, извршна и законодавна, вели Здравев за Слободен печат.

Додека траеше седницата пратеникот Мицевски од говорницата истакна дека не е доблесно што Судскиот совет не го штити и образложува својот предлог.

– Очекував барем претседателот на Судскиот совет да ја каже биографијата на Кацарска за да дискутираме како пратеници. Срамота, рече Мицевски на собраниската седница.