Кинески државјанин е уапсен во Бор, во источна Србија, под сомнение за посредување во проституција, објави полицијата на 28 јули.

Како што пренесува Н1 телевизија, полицијата во Бор изјави дека 28 годишен Кинез се сомничи дека во текот на јули донел жени од Индонезија во Србија за да се занимаваат со проституција, а потоа им наоѓал клиенти на територијата на Бор.

Тој ќе биде изведен пред надлежното обвинителство.

Полицијата, исто така, поднесе прекршочни пријави против три индонезиски жени под сомнение дека се занимавале со проституција. Тие беа изведени пред Судот за прекршоци по скратена постапка, се наведува.

Според извештајот на американскиот Стејт департмент за трговија со луѓе за 2024 година, Владата на Србија „не ги исполнува целосно минималните стандарди“ за борба против трговијата со луѓе, но, како што е наведено, вложува значителни напори за тоа.

Во извештајот на Глобалната иницијатива за борба против транснационалниот организиран криминал, Србија е препознаена како „извор, транзит и дестинација“ за жртвите на трговија со луѓе.