Гостиварското обвинителство соопшти дека ќе ја истражува сообраќајната несреќа што се случи во саботата на магистралниот пат Гостивар-Кичево, во која едно лице загина, а вкупно седуммина беа повредени, од кои четворица потешко.

Според Обвинителството, сообраќајката, во која учествуваа три возила, ја предизвикал возачот на џип „Мерцедес“, за кого беше утврдено дека е Зоран Милески – Кичеец, осуден за случајот „Рекет“, кој бил пуштен на отсуство од затворот во Струга поради лекарски прегледи. Обвинителството побара притвор за Кичеец, а гостиварскиот суд го прифати предлогот и доцна попладнево му одреди 30-дневен притвор на осомничениот.

„Основното јавно обвинителство Гостивар донесе Наредба за спроведување истражна постапка против едно лице осомничено за кривично дело – Тешки дела против безбедноста на луѓето и имотот во сообраќајот според член 300 став 2 во врска со член 297 став 1 од Кривичниот законик. На 4 септември, на магистралниот пат Кичево-Гостивар, осомничениот како учесник во сообраќајот на јавните патишта не се придржувал кон прописите и го загрозил јавниот сообраќај. Движејќи се со патничко моторно возило „Мерцедес“ со кичевски регистарски ознаки, тој на критичното место не ја прилагодил брзината на движење според состојбите и условите на патот и на видно обележана полна надолжна линија започнал престигнување на возилото пред него – автомобил „БМВ“ со тетовски регистарски ознаки. Во истиот момент, во обратна насока кон Кичево се движел автомобил „Санг Јонг“ со гостиварски ознаки, на кое осомничениот му го попречил патот, па директно удрил со предниот десен дел од „Мерцедесот“ во предниот десен дел од автомобилот „Санг Јонг“. Удреното возило со левиот страничен дел, пак, удрило и во автомобилот „БМВ“ кој бил претекнуван. Во несреќата, животот го загубил сопатник во автомобилот „Санг Јонг“, четири лица се здобиле со тешки телесни повреди, а тројца, меѓу кои и осомничениот, се здобиле со телесни повреди“, се вели во соопштението.

„Поради опасност од бегство, можност за влијание врз сведоците/оштетените и можност за повторување на делото, јавниот обвинител до судијата на претходна постапка од Основниот суд во Гостивар достави предлог за определување мерка притвор за осомниченото лице“, додаваат од Обвинителството.