Холивудскиот актер Кевин Костнер поднел документи на суд со кои бара неговата сопруга Кристин Баумгартнер да го напушти неговиот дом, во согласност со нивниот предбрачен договор, пишува „Дејли Меил“.

Славниот оскаровец рекол дека откако Баумгартнер поднела барање за развод на 1 мај, имала 30 дена да се исели од куќата, објави ТМЗ во вторникот по прегледувањето на правните документи. Костнер пред судот изјавил дека верува дека Баумгартнер останала во куќата за да го убеди да исполни „различни финансиски барања“ што таа ги поставила по нивното разделување.

Сепак, Костнер изјавил дека на Баумгартнер веќе ѝ обезбедил 1,45 милиони долари во предбрачен договор, што се доволно средства за да најде ново место за живеење.

Актерот, кој има три деца со Кристин, пред судот изјавил дека е подготвен да преземе дополнителни „финансиски обврски“ доколку тоа ѝ помогне да го напушти неговиот дом. Судските документи, исто така, наведуваат дека тој е подготвен да плаќа 30.000 долари месечно за издршка и кирија за децата и е подготвен да плати уште 10.000 долари за нејзините трошоци за селење.

Имено, тој во судските документи изјавил дека е единствен сопственик на трите семејни куќи и според предбрачниот договор што го потпишале кога се венчале во 2004 година, Кристин се согласила да ги напушти домовите во случај да се разведат.