Специјалниот претставник на САД за климатски прашања, Џон Кери, попладнево пристигна во Европската комисија за да разговара со европските партнери за глобалната климатска стратегија.

Пред да им се придружи на еврокомесарите за редовниот неделен состанок, Кери се обрати кусо пред новинарите.

Тој изјави дека светот се наоѓа во вонреден економски момент кога треба да се развиваат и експлоатираат новите технологии кои ќе овозможат ефективна борба против климатските промени и порача дека САД „нема подобар партнер од Европа”.

-Мораме да се усогласиме, ниедна земја нема да ја реши кризата сама, ќе треба и владите, и граѓанското општество и приватниот сектор, трилиони долари и евра ќе бидат потребни, но сите економски анализи покажуваат дека поскапо ги чини граѓаните да не одговориме на предизвиците отколку да одговориме, рече Џон Кери од Брисел.

Претставникот на американската администрација потсети дека претседателот Бајден планира самит посветен на климатските прашања за да се зајакнат амбициите.

-Договорот од Париз сам по себе не е веќе доволен, сѐ уште гледаме глобално затоплување дури иако правиме сѐ што е зацртано во овој договор, а не го правиме тоа, прашање на здрав разум е да се одработи работата, науката ни вели дека оваа декада, 2020-2030, мора да биде декада на акција, додаде Џон Кери.