Контроверзниот рапер Канје Вест е предупреден дека полицијата ќе го уапси ако спомне нацистички коментари за време на неговиот претстоен концерт во Сао Паоло, пишува „Еуро њуз“.

Иако раперот неодамна изрази длабоко каење за своите антисемитски забелешки, властите на Сао Паоло нема да ризикуваат кога Канје Вест ќе настапи на хиподромот Интерлагос на 29 ноември.

Зборувајќи за претстојниот концерт, градоначалникот на Сао Паоло, Рикардо Нунес, изјавил дека секој што ќе зборува за нацизмот или за кој било фашистички режим ќе биде уапсен на концертот.

„Никој што промовира нацизам нема да кажува или пее текст на јавна опрема што ѝ припаѓа на градската власт. Ќе направиме сè што е потребно за да се осигураме дека никој што промовира нацизам нема никакви активности овде во Сао Паоло“, изјавил тој.

Организаторите Гилерме Кавалканте и Жан Фабрисио Рамос исто така ќе се соочат со апсење доколку нивниот непредвидлив клиент го прекрши правилото.

Советникот Крис Монтеиро, исто така, поднесе жалба до канцеларијата на државниот обвинител на Сао Паоло во врска со песната „Хајл Хитлер“.

Ова ја поттикна обвинителката Ана Беатрис Переира де Соуза Фронтини да издаде наредба со која се забранува прикажување на каква било нацистички симболи или свастика на концертот на Вест.