Шефицата на европската дипломатија, Каја Калас, изјави дека е подготвена да предложи нови санкции врз Иран како одговор на она што го опиша како брутално задушување на протестите во земјата.

„ЕУ веќе воведе сеопфатни санкции врз Иран – врз оние кои се одговорни за кршење на човековите права, активности за ширење на нуклеарно оружје и поддршката на Техеран за војната на Русија во Украина“, изјави Калас за германскиот весник „Ди Велт“, кој ги објави нејзините забелешки во неделата.

„Подготвена сум да предложам дополнителни санкции како одговор на бруталното задушување на демонстрантите од страна на режимот“, додаде таа.

Според информациите од германската агенција, првично се очекува да бидат предложени казнени мерки против оние кои се одговорни за насилството врз демонстрантите, вклучително и министрите. Санкциите би можеле да вклучуваат ограничувања за патување и замрзнување на сите средства под јурисдикција на ЕУ.

Според потпретседателката на Комисијата и висока претставничка на ЕУ, Иранците ризикуваат сè за да се слушне нивниот глас, а режимот има долга и тешка историја на задушување на протестите, при што безбедносните сили на земјата повторно реагираат брутално.

Иран: Само нека нè нападнат Американците и Израел, па ќе им се одмаздиме