Со доаѓањето на топлите денови и високите температури, покрај убавото време, во домовите сè почесто се појавуваат и муви — едни од најдосадните летни штетници. Наместо употреба на агресивни хемиски средства, многумина сè повеќе се свртуваат кон природни и побезбедни решенија кои можат ефикасно да помогнат во нивното отстранување.

Експертот за безбедност во домот Нил Мекензи сподели едноставен трик за спречување на мувите во домот, а за него се потребни само лимон и неколку каранфилчиња.

Според него, комбинацијата од лимонов сок и природните масла од каранфилчињата создава силен мирис кој им пречи на мувите и ги одбива.

За оваа метода, потребно е лимоните да се пресечат на половина, а во нив да се забодат неколку каранфилчиња. Потоа половинките се поставуваат на места каде што најчесто се појавуваат муви — во близина на овошје, на прозорски даски, покрај канта за отпадоци или на кујнски површини.

Овој природен начин не само што е ефикасен, туку е и побезбеден во споредба со хемиските препарати. Лимонот треба да се замени по три до пет дена, односно кога ќе се исуши.

Како дополнително решение, може да се подготви и природен спреј од масло од нане и бел оцет. За подготовка се мешаат една шолја вода, една шолја бел оцет, неколку капки етерично масло од нане и малку детергент за садови.

Смесата треба добро да се протресе, а потоа да се испрска на рамките од вратите, прозорците, надворешните маси и кујнските површини.

Експертите нагласуваат дека најважна е превенцијата. Редовното одржување на хигиената во домот значително помага во спречување на појавата на муви. Тоа вклучува редовно фрлање на отпадот, темелно чистење на кантите за ѓубре и чување на храната покриена.

Исто така, овошјето и зеленчукот што почнуваат да скапуваат треба веднаш да се отстранат, бидејќи токму тие најмногу ги привлекуваат мувите.