Оригиналната кацига C-3PO (Sitripio) од „Војна на ѕвездите“ (Star Wars) од приватната колекција на британскиот актер Ентони Даниелс, кој го носеше како робот во филмот „Враќање на џедајот“ (Return of the Jedi) од 1983 година, е продадена на аукција за 843.750 долари.

Аукциската куќа „Пропстор“ проценила пред аукцијата дека кацигата би можела да достигне цена од 500.000 до 1 милион долари.

Роботот е врв на колекцијата што актерот ја понуди на аукцијата. Првиот дел од продажбата се одржа во ноември, а втората глава на C-3PO од филмот „Нова надеж“ (A New Hope) беше продадена за повеќе од 800.000 долари.

Даниелс, кој го играше дроидот во франшизата „Војна на ѕвездите“, претходно изјави дека се надева дека сувенирите „ќе најдат нови домови во кои ќе бидат изложени и во кои ќе уживаат нивните обожаватели“.

Аукциската куќа „Пропстор“ објави дека кацигата се појавува во „неколку сцени“ од филмот во режија на Ричард Марканд, а сценариото го напишаа Лоренс Касдан и Џорџ Лукас.

Во описот на „Пропстор“ е наведено дека кацигата е направена од „многу тенок фиберглас“, дека оригиналните жици се сè уште недопрени и дека очите на дроидот сè уште светат „кога ќе се активира внатрешен прекинувач“.

За C-3PO пристигнале осум понуди, но не се знае кој дал највисока понуда.

Аукциската куќа претходно објави дека дроидот од „Војна на ѕвездите“ е „еден од најпрепознатливите филмски дизајни на сите времиња“ и го опиша како „еден од најзначајните артефакти од оригиналниот филм од ‘Војна на ѕвездите’ што е понуден на пазарот“.

Кацигата се појавува во повеќе сцени во „Враќањето на џедајот“ во текот на битката кај Ендор.