Колку љубовта кон фитнесот и спортот ти помогнаа во бременоста и по неа, за враќање во форма? Колку време ти беше потребно да влезеш во старата гардероба?

– Од кога знам за себе спортувам. Спортувањето ме чисти одвнатре, ме одржува однадвор и ми ја полни душата со задоволство и, се разбира, ми ја дава енергијата што ми е потребна. Начинот на живот, во поглед на вежбањето, само ми ги олесни бременостите и враќањето во форма. Се смеам кога ќе помислам дека 13 килограми за првата, и 9 килограми за втората бременост качив, и веднаш си ги облеков старите фармерки. Во секој случај динамичниот живот наметнува едно лудо темпо во кое секој треба да го пронајде својот издувен вентил. За мене, денес, тоа е кик бокс за жени.

Што кај тебе промени мајчинството?

-Мајчинството и родителството за двајцата родители менува сè. Имате мали очиња на кои сте им подариле живот и тие во вас го гледаат животот. Тоа, од една страна, е најубавото нешто на светот што ви ја дава најголемата сила и ве прави најхрабра мајка, а од друга страна, и најкревко суштество, зошто гледајќи во тие очи ја спознавате суштината на животот. Благодарна сум на животот што имам за кого да живеам, творам и да бидам сè подобра личност.

Мислиш ли дека на убавите жени им треба двојно повеќе труд да се докажат или напротив, убавината ги отвора вратите кон успехот?

-Тоа што е убаво и на бог му е драго. Секој сака да биде опкужен со убавина, но за успех потребно е многу повеќе од убавина. Интелигенција и се разбира, труд. Се водам по онаа „старата“ дека секогаш на крајот трудот се исплати.

Што обично им подаруваш на твоите пријателки, а каков подарок тебе те прави среќна?    

– Искрените пријателства се реткост во ова секојдневие и доколку ги имате покрај вас сметајте дека тие сами по себе се најубавиот подарок. А, мене, најсреќна на свет неодамна ме направија честитките за 8-ми март од сопругот и децата.