Јосиповиќ за „Слободен печат“: Ние во Уставот внесовме 22 малцинства и имавме само корист
Сведоци сме на неправдата што ѝ се нанесува на Македонија, најпрво тоа беше некоректната позиција на Грција, а сега и на Бугарија, вели поранешниот претседател на Хрватска, Иво Јосиповиќ во интервју за „Слободен печат“.
– Добар дел од она што се бараше или се бара од Македонија ги надминува рамките на легитимните очекувања во поглед на решавање одредени спорови меѓу една членка на ЕУ и држава што треба да стане членка.Мислам дека по договорот со Грција, Европската Унија требаше веднаш да ги исполни своите ветувања врзани за отворањето на патот на Македонија во ЕУ, изјави Јосиповиќ.
На прашањето за уставните измени, тој изјави дека не може и не сака на Македонија да ѝ дава совети за така важни внатрешни прашања, но потсетува на хрватското искуство.
– Ние уште во почетокот на државноста во Уставот внесовме 22 национални малцинства, а со уставниот закон за правата на националните малцинства им дадовме многу широки културни и политички права. И од тоа имавме само корист, додава поранешниот хрватски претседател.
Именувањето на бугарските клубови во Македонија, според него е кокетирање со нацизмот, а рехабилитацијата на квинслинзите е неприфатлива.
Целото интервју со Јосиповиќ ќе го објавиме во утрешниот број на печатеното издание на „Слободен печат“