Легендарните германски пејачки и близначки, Алис и Елен Кеслер, починаа во Гринвалд кај Минхен, на 89-годишна возраст. Веста за нивната смрт ја потресе германската јавност, не само поради големото уметничко наследство што го оставија, туку и поради начинот на кој решија да заминат – заедно си го одзедоа животот.

Според пишувањата на германските медиуми „Tagesspiegel“ и „Süddeutsche Zeitung“, Алис и Елен свесно и промислено ја донеле одлуката да го завршат својот живот со медицинска помош, процедура која е легална во Германија под строго утврдени услови. Нивното заминување го надгледувала специјализирана лекарка, во присуство на правен застапник, за да се осигура дека сè е спроведено во согласност со законот.

Полицијата соопшти дека нема никакви сомнителни околности или траги од насилство, потврдувајќи дека сестрите останале доследни на својата последна одлука.

Уште во 2024 година, Алис и Елен отворено зборуваа за крајот на својот живот и открија дека сакаат да бидат погребани заедно, во иста урна, заедно со мајката и саканиот куче Јело (Yello).

„Во смртта обединети — така би сакале“, изјавија тие за „Süddeutsche Zeitung“.

Нивната одлука е доживеана како последен израз на нерскинливата поврзаност што го обележа целиот нивни живот – од детството и првите настапи, преку блескавата кариера, сè до последниот здив.