Поранешниот јапонски премиер Томичи Мурајама – познат по тоа што официјално се извини за Втората светска војна – почина денес од старост, на 101 година, објави Кјодо Њуз.

На власт од 1994 до 1996 година, Мурајама даде изјава во 1995 година, по повод 50-годишнината од капитулацијата на Јапонија, во која изрази „искрено извинување“ и  „длабоко каење“ за злосторствата извршени од неговата земја во Азија.

„Томичи Мурајама, таткото на јапонската политика, почина денес (…) во болница во градот Оита, на 101-годишна возраст“, ​​изјави Мизуо Фукушима, претседател на Социјалдемократската партија, која се смета за наследник на Социјалистичката партија на Мурајама, која повеќе не постои, преку Икс.

Во својата историска изјава од август 1995 година, Мурајама рече дека Јапонија, со своето „колонијално владеење“ и „агресија“, предизвикала огромна штета и страдање на народите на бројни земји, особено на азиските.

„Со надеж дека таква грешка нема да се повтори во иднина, во духот на понизност ги сметам овие историски факти за неоспорни и уште еднаш го изразувам моето длабоко жалење и моето искрено извинување“, се вели во соопштението.

Оваа изјава стана референтна точка за извинувањата што следеа во врска со Втората светска војна.

Изразите „длабоко жалење“ и „искрено извинување“ последователно ги повторуваа останатите јапонски премиери на церемониите по повод 60-годишнината и 70-годишнината од Втората светска војна.

Томичи Мурајама беше избран за премиер како дел од коалициска влада во која беше вклучена и владејачката Либерално-демократска партија.

Тој беше премиер од 1994 до 1996 година, период во кој во 1995 година се случи силен земјотрес во Западна Јапонија и напад со сарин во метрото во Токио, во кој загинаа повеќе од 10 лица, а беа повредени повеќе од 5.800.