Поради градежни работи на булеварот „Македонија“, во недела од рано наутро целосно ќе биде затворен за сообраќај делот од Стара Рампа во Кисела Вода до семафорите кај Црвен Крст.

Од Град Скопје соопштуваат дека затворањето е неопходно за поставување на завршниот слој асфалт, во рамки на првата фаза од реконструкцијата на булеварот.

Апелираат до возачите да имаат трпение, да ја следат привремената сообраќајна сигнализација и да ги користат алтернативните сообраќајни правци.

Според градските власти, со оваа фаза од проектот треба да се овозможи подобра проточност на сообраќајот, помал метеж и побезбедно движење по обновениот коловоз.

Со проектот за реконструкција на булеварот „Македонија“ е предвидена и изградба на подземна сообраќајница, која по завршувањето треба да придонесе за модернизација на сообраќајната мрежа во Скопје.