Македонскиот графички дизајнер Зоран Кардула со изложбата „Редизајн на југословенскиот дизајн“ се претстави пред ликовната публика во Галеријата на современата уметност во Пожаревац, Србија. Изложбата содржи околу 90 плакати од две тематски целини: редизајн на југословенските брендови (од туристички брошури преку амбалажи на производи и рекламни материјали до значајни плакати за културни, спортски и политички манифестации) и илустрации на монументалните бруталистички споменици на антифашистичката борба во Југославија.

Визуелните истражувања кои Кардула ги реализира со графичкиот дизајн се значајни затоа што на иновативен начин го преиспитуваат југословенскиот модернизам и на тој начин го промовираат таквото наследство со реинтерпретација на содржините низ нови медиуми и во современ контекст, известија српските медиуми.

(Текстот е објавен во „Културен печат“ број 17, во печатеното издание на „Слободен печат“ на 8-9 февруари 2020)