Италијанската полиција уапсила 55 лица осомничени за врски со сицилијанската мафија во голема операција против организираниот криминал, јави ДПА. Осомничените се обвинети за изнуда, трговија со дрога и поседување оружје и експлозиви, соопштува италијанската полиција.

Полициските рации биле извршени во областа на сицилијанскиот град Калтанисета, но и во други делови на Италија.

Во големата операција учествувале околу 500 службеници за спроведување на законот.

„Денешната операција е од особена важност, не само во однос на количината, туку и во однос на квалитетот“, изјави за новинарите Салваторе Де Лука од обвинителството во Калтанисета.

Коза Ностра е најпознатата и најактивна мафијашка организација на италијанскиот медитерански остров. Има и помали криминални организации како што е Стида.

Фокусот на операцијата бил на градот Гела на Сицилија. Таму две големи мафијашки семејства склучија сојуз со Стида за да го организираат бизнисот со дрога.

Се тврди дека мафијашките семејства користеле незаконски стекнати добивки за да изградат неколку оранжерии за одгледување канабис. Има извештаи дека дрогата била продавана во областа или користена како средство за размена со калабриската мафија Ндрангета за да се добие кокаин.