Иранскиот министер за надворешни работи, Абас Арагчи, денес изјави дека новиот врховен лидер на земјата, Моџтаба Хамнеи, е во добра здравствена состојба и целосно ја контролира ситуацијата.

Иранските власти признаа дека тој е ранет во израелскиот напад, но тврдат дека повредите на 56-годишниот лидер не се сериозни.

Моџтаба Хамнеи неодамна беше именуван за врховен лидер на Иран откако неговиот татко, ајатолахот Али Хамнеи, беше убиен во американско-израелски напад, но не се појави во јавноста откако ја презеде власта.

Иранската револуционерна гарда пак се закани дека ќе го таргетира израелскиот премиер Бенјамин Нетанјаху.

„Ако овој криминалец кој убива деца е жив, ќе продолжиме да го прогонуваме и да го убиеме“, соопшти гардата, пренесуваат иранските медиуми.

Корпусот на Исламската револуционерна гарда (ИРГЦ) на 2 март соопшти дека во десеттиот бран е извршен ракетен напад врз комплексот на израелската влада во Тел Авив, односно врз канцеларијата на Нетанјаху, како и врз безбедносни и воени центри во Хаифа и источен Ерусалим.