Откако американскиот претседател Доналд Трамп се пофали дека неговиот личен апел до иранските власти спасил осум жени демонстрантки од сигурна смрт со бесење, иранската амбасада во Јужна Африка објави порака што го шокираше светот:

„Ура, Трамп спаси осум жени создадени од вештачка интелигенција“.

Hurray, Trump saved 8 AI-generated people. https://t.co/q9Tcbfht15

— Iran Embassy SA (@IraninSA) April 22, 2026

Оваа објава на социјалната мрежа Икс (поранешен Твитер) следеше како ретвит на објава од Белата куќа, која пак пренесе објава на Трамп од неговата платформа Трут соушал. Се чини дека иранската страна одлучила да го замени дипломатскиот протокол со чист сарказам, што сугерира дека Трамп, во својата потрага по уште една дипломатска победа, станал жртва на најчестата манипулација со вештачка интелигенција.

Целата приказна почна два дена претходно, кога Трамп упати драматичен апел до иранските лидери, барајќи помилување за осум жени кои, според него, се соочувале со смртна казна со бесење.

„Одлични вести! Тукушто ме информираа дека осумте жени демонстрантки кои требаше да бидат погубени во Иран вечерва, сепак нема да бидат погубени. Четири ќе бидат веднаш ослободени, а четири ќе добијат едномесечни затворски казни. Многу го ценам тоа што Иран и неговите лидери го послушаа моето барање, како претседател на Соединетите Американски Држави, да ја запрат планираната егзекуција. Ви благодарам за вашето внимание!“, напиша Трамп синоќа, очигледно уверен дека спречил трагедија.

Сепак, од самиот почеток, овој случај е проследен со контрадикторни информации што ги доведуваат во прашање самите основи на тврдењата на Трамп. Имено, според сите достапни извештаи од Иран, на посочените жени никогаш не им се заканувала смртна казна.

Иранската организација за човекови права со седиште во Осло, завчера објави дека две од осумте жени веќе биле ослободени со кауција, долго пред жалбата на Трамп. Дури и официјален Техеран реагираше на првото соопштение на Трамп, нагласувајќи дека некои од жените веќе се слободни и дека ниту една од нив не се соочува со смртна казна.

По соопштението на иранската амбасада за „луѓе генерирани од вештачка интелигенција“, останува отворено прашањето какви информации тимот на Трамп користел за да го состави соопштението за „спасувањето“ на демонстрантките. И покрај неизвесноста околу идентитетот на жените, финансиските пазари реагираа позитивно на веста за комуникацијата меѓу Вашингтон и Техеран.