ИОК: Нема повеќе одложување на Летните олимписки игри
Поради пандемијата, новиот план на организацијата ги вклучува и сите неопходни мерки на здравствена заштита за безбедност на сите граѓани.
Како што е веќе познато, поради пандемијата на коронавирусот следните Летни олимписки игри во Токио ќе се одржат во периодот од 23 јули до 8 август 2021 година.
Меѓународниот олимписки комитет им се обрати на Националните олимписки комитети со новиот „сет“ информации во врска со подготовките за организацијата на Игрите кои ќе бидат во Јапонија.
Заедничката работна група која ја предводи претседателот на Координациската комисија на ИОК, Џон Коутс и претседателот на Организацискиот одбор на Токио 2020, Мори Јоширо, си поставија рок до крајот на мај 2020 година да направи нов оперативен план за успешно одржување на Игрите, како и да се подготви нов календар за натпреварувањата на ЛОИ во Токио.
Една од поважните цели беше да се пронајдат начини за поедноставување и оптимизирање на услугите за сите учесници со цел да се намалат трошоците што произлегуваат од одложувањето на Игрите, но така што тоа да не влијае на квалитетот на овие услуги.
Поради пандемијата, новиот план на организацијата ги вклучува и сите неопходни мерки на здравствена заштита за безбедност на сите граѓани.
На овој начин, Меѓународниот олимписки комитет јасно ја покажа својата решеност и посветеност за успешно одржување на Олимписките игри во Токио следната година и ги запре шпекулациите што протекоа во медиумите околу можноста за повторно одложување на Олимписките игри.