Црно-бели фотографии со заеднички наслов „Прага интима“ на македонскиот автор Влатко Деков се поставени на изложбата во просторот на НЛБ Галерија. Во својот кус опис за изложбата авторот кажа: „Постојат места каде што времето е застанато, а со него и приказните за луѓето што живееле таму. Во тие места се заљубуваме, нѐ маѓепсуваат и нѐ цртаат како ликови во нивните приказни, кои потоа ги раскажуваме. Прага интима е визуелна приказна за едно такво место. Личен, интимен портрет на еден од најубавите градови и магични места во светот, Прага“.

Проектот е работен две години, период во кој авторот ја посетува Прага повеќепати, живее и ја фотографира во текот на летниот и во зимскиот период. Изложбата содржи 34 црно-бели фотографии, а воедно е објавена и фото-книга со истоимен наслов. Книгата е во издание на издавачката куќа „Или-или“.

– Авторот на оваа прекрасна изложба создава автентична поетика на својот визуелен израз и нѐ „заробува“ во убавината на деталите на прекрасната Прага. Црно-белиот шарм на фотографиите е оној додатен шлагворт врз целата концепција, бидејќи само во црно-белото можете да ги замислите и да ги видите сите бои на светот. А што претставува светот доколку заборавиме на фантазијата!? – загатна Игор Анѓелков од „Или-или“. Изложбата „Прага интима“ од Влатко Деков ќе биде отворена до 17 февруари оваа година.

(Текстот е објавен во „Културен печат“ број 17, во печатеното издание на „Слободен печат“ на 8-9 февруари 2020)