Инспекторатот ѝ забрани на „Дрисла“ да собира и складира опасен отпад

Дрисла / Фото: МИА

Државниот инспекторат за животна средина ѝ забрани на „Дрисла“ да врши прием и третман на опасен отпад, бидејќи нема соодветни инсталации за третман и за преработка на вакви видови на отпад. Како што соопшти на денешната прес-конверенција директорот на ДИЖС, Сретен Стојковски, инспекторатот ѝ изрекол решение на ЈП „Дрисла“ да не прифаќа и да депонира 22 вида опасен отпад во кој, меѓу другото, спаѓа отпад од киселини, пестициди, бази, како и отпад кој содржи жива.

Инспекторатот побарал „Дрисла“ од Министерството за животна средина, кое е надлежно за издавање на А-интегрираните дозволи, во рок од 90 дена да побара измена на дозволата и да ги раскине сите склучени договори за прием и третман на опасен отпад. „Дрисла“ не е парично казнета, но во моментов не прима опасен отпад.

Директорот Стојковски ја критикуваше поранешната директорка на инспекторатот, Ана Петровска дека како директорка не реагирала на оваа неправилност иако учествувала во инспекцискиот увид кој му претходи на издавањето на А-интегрираната дозвола на скопската депонија „Дрисла“ во рамките на која било дозволено.

„Директорката требало да ѝ ја одземе дозволата на Дрисла за тие шифри“, рече директорот на Државниот Инспекторат за животна средина.

Надлежен орган за издавање на А-интегрирани еколошки дозволи е Управата за животна средина при Министерството за животна средина, кое ваквата дозвола и го издало на Дрисла во февруари годинава.

„Јас не знам како е издадена таква дозвола на Дрисла за складирање на таков вид на отпад“, рече Стојковски, но, според него, вината за вака издадената дозвола ја има Петровска, која не ја укинала.

Стојковски како кадар на ДОМ дојде на челото на Државниот инспекторат за животна средина откако Владата пред неколку месеци ја смени Петровска, поранешна сопартијка на Стојковски, од директорската позиција во Државниот инспекторат за животна средина поради личниот конфликт со претседателката на ДОМ, Маја Морачанин. Петровска сега е актуелен кандидат за градоначалник на Скопје на граѓанската иницијатива „Зелен хуман град“ на локалните избори.

Инспекторатот ѝ забрани на „Дрисла“ да собира и складира опасен отпад

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот