По два неуспешни обиди за лансирање во август и септември, мисијата „Артемис 1“на НАСА минатата недела конечно полета кон Месечината. Планирано е прелетувањето да биде почеток на новата програма на лунарните мисии на американската влада речиси точно педесет години по завршувањето на проектот Аполо, со кој се спуштија првите луѓе на Месечината. Оттогаш, ниту една мисија со екипаж не го посетила најблискиот придружник на Земјата во вселената.

„Артемис 1“ е првата од трите мисии кои имаат за цел да пратат луѓе на Месечината до 2025 година.

Во оваа трка не учествуваат само САД, откако уште неколку земји и приватни компании најавија мисии на Месечината. По успешното слетување на кинеските сонди „Чанг’e 3“ во 2013 година, „Чанг’e 4“ во јануари 2019 година и „Чанг’e 5“ во 2020 година, прашање е која ќе биде следната вселенска агенција или компанија што ќе успее да стигне до Месечината.