Индискиот регулатор за лекови открил дека сирупите за кашлица и за алергија направени од Норис Медицинс се токсични, според владиниот извештај, неколку месеци откако индиските сирупи за кашлица беа поврзани со смртта на 141 дете ширум светот.

Лековите биле контаминирани со диетилен гликол или етилен гликол, кој е пронајден во сирупите за кашлица кои предизвикуваат смртни случаи во Гамбија, Узбекистан и Камерун од средината на минатата година.

Х.Г. Кошија, комесар на Управата за храна и лекови во индиската држава Гуџарат, изјави денеска дека минатиот месец ја провериле фабриката Норис и наредиле да го прекине производството.

Индискиот федерален регулатор за лекови откри дека три пратки со сируп Колд аут (COLD OUT) произведен од индиските лаборатории Фуртс (Fourrts) исто така биле контаминирани со наведените хемикалии.

Светската здравствена организација (СЗО) во август објави дека пратка од тој сируп продадена во Ирак има неприфатливо ниво на тие хемикалии.