Индискиот министер за одбрана Раџнат Синг изјави денес дека неговата земја ќе ја искористи борбената моќ на својата морнарица за да одговори на секоја идна агресија од страна на Пакистан, неколку недели откако заврши најжестокиот судир меѓу двете нуклеарни сили во последните децении.

„Доколку Пакистан се обиде да изврши каков било злобен или неморален чин, овој пат ќе се соочи со огнената моќ и гневот на индиската морнарица“, рече Синг додека беше на носачот на авиони ИНС Викрант во близина на брегот на западната индиска држава Гоа, објави Ројтерс.

Портпаролот на пакистанската армија, од друга страна, рече дека секој пат кога суверенитетот на Пакистан е загрозен и неговиот територијален интегритет е нарушен, ќе се соочи со решителен и сеопфатен одговор, според агенцијата.