Помешани чувства имаше селекторот Марјан Илиевски, селекторот на македонската сениорска кошаркарска репрезентација, по поразот од Унгарија кој на крајот беше и убедлив во рамките од претквалификациите за Светскиот куп 2027.

– Очекував натпреварот да биде малку поинаков бидејќи мислам дека овие 38 разлика се премногу во однос на квалитетот на двете репрезентации. Мислам дека нашите кошаркари премногу ги респектираа Унгарците и тука треба да се бараат причините за нашиот пораз – вели Илиевски.

Има и други работи за анализирање на играта во овие 40 минути кои нашата селекција ги прикажа во мечот со Унгарија:

– Одигравме добра четвртина, но противникот беше исклучително расположен за шут. Погоди 15 тројки со 40% шут од дистанца. Унгарија поседува квалитет и беше мошне мотивирана за победа пред своите навивачи кои дадоа голема поддршка – се зборовите на Илиевски.

Има место и за некои моменти на задоволство кај Илиевски:

– Задоволен сум од младите кошаркари и се надевам дека во иднина ќе играме многу подобро, но ни останува да се подобруваме, во секој поглед. Верувам дека во иднина ќе се надградуваме, а она на што треба да обрнеме внимание е дека кога резултатот оди во негатива, да не бараме брзи решенија бидејќи така само се продлабочува кризата. Јас им давам поддршка на играчите, тие даваат максимум, но евидентно е дека се уште недостасува искуство. Меѓутоа, сето она кое ќе следи е реалност, а таа реалност е искуството кое сè уште не постои кај нас – кажа Илиевски по мечот во Солнок.