Златан Ибрахимовиќ повторно ќе игра за репрезентацијата на Шведска, пренесуваат шведските медиуми. Играчот на Милан би можел да настапи на квалификацискиот натпревар против Грузија на 25 март.

Се очекува да се најде на списокот на играчи на репрезентацијата на Шведска за квалификациите за Светското првенство, информира шведскиот портал „Фотболдирект“, повикувајќи се на свои извори.

Изворот вели дека Златан е поканет да игра на квалификацискиот натпревар против Грузија, кој е закажан за 25 март. Првите луѓе на шведскиот фудбал не сакаа да го потврдат враќањето на искусниот фудбалер и истакнаа дека конечниот список ќе биде познат на 18 март.

Ибра играше за репрезентацијата на Шведска од 2001 до 2016 година и досега настапи на 116 натпревари со постигнати 62 гола. Од минатата година тој игра за италијански Милан, каде реализираше 24  погодоци на 33 мечеви.

За кратко време, тој стана многу популарен во Италија, а во изминатиот период се појави и на музичкиот фестивал во Санремо, каде што отпеа популарна италијанска песна со Синиша Михајловиќ.

ВИДЕО | Михајловиќ: Пријателството со Златан започна кога ме удри со глава!