Системот за рано предупредување за земјотреси на Гугл за андроид уредите не успеа да предупреди милиони луѓе во Турција за смртоносните земјотреси во 2023 година, во кои загинаа околу 55.000 луѓе.

Компанијата призна дека околу 10 милиони луѓе што живеат во радиус од 150 километри од епицентарот можеле да добијат највисоко ниво на предупредување на своите телефони и таблети. Доколку тоа се случеше, ќе имаа до 35 секунди да се поместат на безбедно место, објавува Би-би-си.

Наместо тоа, Гугл испрати само 469 пораки „Преземете акција“, кои се поблаги, за време на првиот земјотрес од 7,8 степени. Ова е највисокото ниво на предупредување, кое е придружено со звук, дури и кога корисникот го има телефонот на нечујно. Ова би можело да биде ефикасно во Турција. Пониско ниво е „Бидете внимателни“.

Во публикација во научно списание, истражувачите на Гугл велат дека системот погрешно го пресметал првиот земјотрес. Проценката на системот била релативно благ потрес од 4,5 до 4,9 степени, наместо вистинската јачина од 7,8 степени.

Системот, исто така, не успеал правилно да го процени вториот земјотрес, кој бил со сличен интензитет како првиот. Овој пат, предупредувањата на високо ниво биле околу 8.000, а едноставните предупредувања повеќе од 4 милиони.

Ретроспективно, истражувачите увиделе дека доколку алгоритмот работел правилно при првиот земјотрес, тој би испратил 10 милиони предупредувања на високо ниво и уште многу милиони до оние што живеат подалеку од епицентарот.

Земјотресот, на 6 февруари 2023 година, се случил ноќе. Многу од жртвите загинале кога зградите се урнале додека жителите спиеле.

Системот за предупредување за земјотреси на андроид е достапен во 100 земји низ целиот свет, вклучувајќи ја и Грција. Тој детектира земјотреси од мобилните телефони на корисниците, ја пресметува магнитудата и испраќа порака. Бидејќи сеизмичките бранови се движат релативно бавно, постои маргина од неколку секунди за секој да се заштити, временска маргина што може да се покаже како спасоносна.