Во текот на вчерашниот ден голем скандал го погоди македонскиот фудбал, откако голманот на ФК Аеродром беше претепан во Слупчане во натпреварот со Беса.

Денеска беа уапсени и двајца фудбалери на домаќините за нападот, а со соопштение се огласи и тимот на Аеродром од каде што информираа дека покрај голманот, физички биле нападнати уште двајца нивни фубалери.

Од Аеродром велат дека чуварот на мрежата и денеска е во болница.

„По последниот судиски свиреж, нашите фудбалери беа физички нападнати од страна на дел од фудбалерите на противничкиот тим. Во инцидентот беа нападнати тројца наши играчи – голманот и уште двајца фудбалери, кои претрпеа телесни повреди и сите беа веднаш пренесени во болница во Скопје, каде што им беше укажана лекарска помош. По укажаната медицинска интервенција, двајца фудбалери се пуштени на домашно лекување, а голманот сè уште е хоспитализиран. Натпреварот заврши со победа на нашиот тим (2:1), а непосредно по досудениот крај, следуваше неиспровоциран и брутален напад врз членовите на ФК Аеродром. ФК Аеродром најостро го осудува овој чин на насилство и апелира до Фудбалската федерација на Македонија, надлежните дисциплински органи и Министерството за внатрешни работи да преземат сите потребни мерки за целосно расчистување на случајот и соодветно санкционирање на сторителите“, велат од клубот.

„Фудбалот мора да остане симбол на спортски дух, фер-плеј и почит, а не поле на агресија и опасност за здравјето на спортистите. Им се заблагодаруваме на сите клубови, спортски работници, навивачи и медиуми кои испратија пораки на поддршка и солидарност со нашите повредени играчи. ФК Аеродром ќе продолжи да се бори чесно на теренот и да го промовира спортот како место на фер натпреварување, со меѓусебна почит и спортски дух“, пишува во соопштението.

Приведени двајца фудбалери на Беса по нападот на голманот на Аеродром