По разделбата со Милан Илиевски, денеска фудбалскиот клуб Работнички објави дека нов тренер на екипата е Гоце Седлоски.

Поранешниот македонски репрезентативец ќе ги води „романтичарите“ кои моментно се на шестото место во Првата фудбалска лига, а во изминатиот период беа елиминирани во четвртфиналето од Шкупи во Купот.

Две недели Работнички беше без тренер откако спогодбено се раздели со Илиевски по високиот пораз од 3:0 против Шкупи.

За Седлоски ова е враќање во македонскиот фудбал, претходно беше на клупата на Турново, Вардар и Шкупи, а во странство ги водеше и Рига (Летонија), Широки Бријег (БиХ), како и вториот тим на Динамо Загреб (Хрватска).

А последниот ангажман го имаше во албанската Влазнија чија соработка траеше само три месеци.

Седлоски со Вардар двапати беше шампион на Македонија во 2016 и 2017 година, а во 2022 беше првак со Шкупи.