Го запрела полиција, а тој дал гас: Тетовец со „БМВ“ удрил полициско возило, со другар му завршија во „Шутка“
Двајца тетовци вчера биле приведени за пронајдена марихуана, но и за тоа што не запреле на полицискиот знак и продолжиле да возат, удирајќи во полициско возило, соопшти полицијата.
Тие попладнево беа испратени во притвор, откако судија во претходна постапка на Основниот суд Тетово го прифатил барањето на Обвинителството и им одредил задржување од 30 дена на двете момчиња, А.Ј. и С.К., на возраст од 27 и 23 години.
„Тие вчеравечер, околу 19 часот и 40 минути, биле уапсени на локалниот пат Тетово-Ѓермо, откако им била пронајдена и одземена марихуана. Пред да бидат уапсени, не запреле на знак даден од полициските службеници и со нивното возило „БМВ“ со тетовски регистарски ознаки, удриле и го оштетиле службеното возило на СВР Тетово“, информираат од тетовската полиција.
Двајцата осомничени се спроведени во затворот „Шутка“.