Ѓоковиќ номиниран за уште едно престижно признание
Српскиот тенисер Новак Ѓоковиќ е номиниран за престижното признание „Лауреус“ кое се доделува за најдобриот спортист во годината.
Ѓоковиќ во текот на 2023 година освои три грен-слем титули и завршниот мастерс, а сега е номиниран за признанието кое се доделува на најдобриот спортист за изминатата година. Набрзо по номинацијата се огласи и српскиот тенисер.
„Воодушевен сум што повторно сум номиниран за светски спортист на годината. Оваа награда ја освојував четирипати и секоја беше многу посебна и незаборавна на свој начин. Ова е чест поголемо од било која друга, бидејќи академијата „Лауреус“ е таа која ја носи одлуката и тие знаат како е да се дојде на врвот во некој спорт, меѓутоа и што е потребно за да се остане таму“, изјави Ѓоковиќ.
Конкуренти на Ѓоковиќ за овогодинешниот „Лауреус“ се атлетичарите: Мондо Дуплантис (Шведска) и Ноа Лајлс (САД), формула 1 возачот Макс Ферстапен (Холандија), како и фудбалерите Ерлинг Халанд (Норвешка) и Лионел Меси (Аргентина).