Гимнастичарката Чусовитина на 48 години се бори за учество на своите деветти олимписки игри
Легендарната гимнастичарка и во зрелите години од животот е активна и се надева дека ќе се избори за норма за учество на ЛОИ Париз 2024
Бесмртната гимнастичарка, Узбекистанката Оксана Чусовитина (48 години), се чинеше дека ги загуби шансите да се квалификува за нејзините деветти Олимписки игри (Париз 2024).
Таа не успеа да обезбеди олимписка норма дисциплината прескок, на која речиси исклучиво се посвети последниве години.
Но, узбекистанската гимнастичарка не се предава. Таа се префрли на дисциплините греда и партер. Тоа е јасен знак дека ќе се обиде да ги исцрпи своите последни опции за да продолжи да пишува историја во овој спорт.
На Азиското првенство во гимнастика што ќе се одржи во главниот град на Узбекистан, Ташкент, од 24 до 26 мај, Чусовитина изгледа е решена да се обиде да обезбеди норма во натпреварите на греда или во партер. За време на Игрите во Париз таа ќе има полни 49 години..
Таа не се откажува да се пласира на нејзините деветти ЛОИ што е рекорд за жена.
Чусовитина досега се натпреварувала за СССР, за Обединетиот тим, за Германија и за Узбекистан. Таа има два олимписки медали, злато на ЛОИ 1992 и сребро на ЛОИ 2008.