Германскиот суд во Франкентал донесе пресуда според која полнолетните деца мора да ги известат своите родители кога ќе почнат да заработуваат, бидејќи во спротивно може да бидат обврзани да ја вратат примената алиментација. Во конкретниот случај, таткото добил од судот право на поврат на 7.315 евра што му ги платил на својот син, иако синот веќе имал работа со полно работно време во тој период, пишува Fenix magazin.

Оваа одлука би можела да го промени начинот на кој е регулирана исплатата на алиментација за полнолетни деца во Германија. Имено, таткото редовно му плаќал алиментација на својот син со години, иако тој веќе имал работа и стабилен приход.

Според германскиот закон, родителите се должни финансиски да ги издржуваат своите деца дури и откако ќе го напуштат семејниот дом, сè додека се во училиште или посетуваат стручно образование. Оваа обврска трае до крајот на училиштето или на факултетот, а во некои случаи и подолго.

Меѓутоа, кога детето ќе стане финансиски независно, родителите повеќе немаат законска обврска да плаќаат алиментација. Судот во Франкентал сега јасно посочи дека децата мора да ги информираат своите родители за промена во нивните околности, на пример, кога ќе завршат училиште и ќе почнат да работат.

Во овој случај, таткото му плаќал на својот возрасен син 385 евра месечно. Сепак, синот го завршил магистерскиот степен по хемија во мај 2021 година и бил вработен како истражувачки соработник, со нето плата од најмалку 1.800 евра месечно. Тој никогаш не го информирал својот татко за оваа промена.

Дури во јануари 2025 година, таткото случајно дознал, преку Линкедин дека неговиот син има работа и побарал враќање на парите. Судот пресуди во негова корист и му додели право на надомест од 7.315 евра.

Сепак, судот делумно го ограничи барањето на таткото, наведувајќи дека тој има и одговорност да се распраша за состојбата на неговиот речиси триесетгодишен син по завршувањето на редовниот период на студирање. Пресудата сè уште не е конечна.

Износот на алиментацијата во Германија се одредува според таканаречените Диселдорфски табели кои се ажурираат секоја година. Овие табели пропишуваат минимални износи на издршка во зависност од приходите на родителите и од возраста на детето.

Постојат два основни вида издршка: парична издршка – редовни месечни плаќања во готово и природна издршка – покривање на дневните трошоци како што се храна, сместување и џепарлак од страна на родителот со кого живее детето.

Во случај на разведени родители, едниот родител обично ги сноси трошоците за издршка на детето, а другиот за финансиска издршка. Кога полнолетните деца живеат сами, двајцата родители се обврзани да учествуваат во плаќањето на финансиската издршка.