Кризниот штаб на Општина Центар, заедно со други надлежни институции утре ќе одржи состанок за начините  за чистење на отпадот и анализа на последиците од пожарот кој пред два дена изби во поранешната фабрика „Треска“. Општината, како што информираат оттаму, ќе побара од овластени лаборатории за животна средина да извршат мерења и да достават извештаи од мерењата за да се одреди што ќе се преземе понатаму.

Какви материјали гореле и дали истите биле закана по здравјето засега можеме само да претпоставуваме. Откако ќе се изврши анализа од стручните институции ќе имаме прецизен увид, но и ќе донесеме одлука за следните чекори како најбрзо и најбезбедно да го отстраниме целиот отпад и расчистиме просторот. Општината ќе се координира со останатите надлежни институции и ќе преземеме соодветни мерки – вели градоначалникот Горан Герасимовски.

По овој состанок и насоките од институциите надлежни за овој проблем, Општина Центар ќе ги знае следните чекори и за тоа ќе ги извести сопствениците на имотите на просторот кај поранешната фабрика.

Повеќе пати сме апелирале за изнаоѓање издржано решение за отпадот кој се наоѓа таму, но поради објективни причини, локацијата сè уште не е исчистена. Чистењето на локацијата е и обврска на сопствениците на објектите. Досега до општината се пристигнати 28 барања за отстранувања на објекти од страна на сопствениците и истите сѐ уште се во постапка – рече Герасимовски.

Според него приоритет на општината е што поскоро безбедено да се расчисти целиот простор кај „Треска“ и да се стави крај на ваквите немили настани, бидејќи поголеми и помали пожари се случувале во изминатиот период повеќе пати. Покрај ова, старите хали се предмет на грабежи, а локалните жители се чуствуваат небезбедно. Во зависнот од  заклучоците на Кризниот штаб, како што вели Герасимовски, можно е да се спроведе и забрзана постапка за издавање дозвола за рушење на објектите, со цел побрзо отстранување на опасниот азбестен отпад.