Сопственикот на отворената депонија во Визбегово, на која на 9 јули гореа автоделови и хаварисани возила и го загади воздухот во цело Скопје, му го одзел насилно мобилниот телефон на новинарот известувач на телевизијата „Алсат“ и го фрлил во огнот, затоа што претходно новинарот снимил како газдата, Александар Николчев, физички го напаѓа.

Според информациите кои ги објави „Алсат“, Николчев, откако бил снимен како физички го напаѓа новинарот Авни Тахири, насилно му го одзел телефонот и го фрлил во огнот, за да го уништи доказниот материјал. Заедно со него, во нападот учествувала и раководителката на компанијата, Маја Каранакова.

Тахири пред истражителите потврдил дека бил нападнат, навредуван и дека му бил одземен телефонот, а снимателот Шенол Хајредини сведочел дека исто така бил физички нападнат од двете лица. Освен тоа, била оштетена и опремата на телевизијата, за која ќе се води судска постапка за утврдување на надомест на штета.

Јавниот обвинител ги сослушал членовите на новинарската екипа во својство на оштетени. Инцидентот се случил на 9 јули околу 10 часот, кога екипата известувала за пожарот кој предизвика сериозно загадување на воздухот во Скопје.

Од „Алсат“ побараа институциите итно да постапат и да обезбедат безбедност за новинарите кои известуваат од терен, посебно во услови кога се откриваат сериозни еколошки и безбедносни закани.