Филмскиот фестивал во Кан, најпрестижниот и најпопуларен фестивал во светот на кинематографијата, започна на 6 јули, а до 17 јули ќе имаме можност да ја погледнеме парадата на некои од најдобро облечените жени на планетата, како на црвениот тепих, така и надвор од него. 

Секоја вечер познатите светски дами парадираат во своите гламурозни креации и скапоцен накит на црвениот тепих. 

A, бидејќи овој фестивал е центарот на филмските и други елити, црвениот тепих е вистински моден деликатес за гледачите и критичарите.

Елеганцијата е на својот врв, а може да се забележи дека повеќето дами избрале раскошни креации во изразито светли нијанси – бела, беж, нежно розова, боја на шампањско…

Слоеви и слоеви од тул, голи грбови, помпезни карнери, светки, пердуви, длабоки изрези и деколтеа вредни за внимание – на фестивалот има сè, а најмалку едноставност.

Сепак, по една година пандемија во која високата мода беше на маргините, вистинско освежување е да се ужива во вакви екстравагантни изданија.