На платото на реконструираниот Офицерски дом вчера вечер започнаа случувањата за прославата на Новата 2022 година кои се во организација на Општина Битола, а насловени како “Зимска приказна“.

Честа први да започнат да ја “раскажуваат“ “Зимската приказна“ ја имаа битолските ди-џеи и битолската група “Фолтин“, која успешно ја „загреаја“ атмосферата.

Иако температурите во Битола вчера вечер беа под нулата, сепак голем број битолчани и љубители на музиката на Фолтин дојда на концертот, а покрај музиката, за загревање имаше топло варено вино, чај и кафе од штандовите кои ќе бидат на платото пред Офицерскиот дом до крајот на „приказната“.

Пред и по настапот на „Фолтин“, битолчани, посебно помладите и тинејџерите имаа можност да се забавуваат со битолските ди-џеи и нивните сетови: Ricardo, T-Zone, Acika, Danny-L…

„Зимската приказна“ ќе трае наредните 7 дена и ќе има богата музичка програма.

Во духот на познатите европски новогодишни настани, и на битолскиот има штандови на кои има пијалоци, ракотворби, интересни јадења и за најмалите има фото-агол за фотографирање со Дедо Мраз.