Фудбалерите на Барселона славеа убедлива победа во вечерашното „Ел Класико“ во шпанскиот Суперкуп кое се играше во Саудиска Арабија (5:2) и така го освоија својот 15. трофеј во ова натпреварување.

Не изгледаше дека натпреварот ќе оди во ваква насока кога Мбапе по пет минути игра донесе предност за Реал Мадрид. Сепак, Барселона брзо преку Ламин Јамал се врати во игра.

Се играше 36. минута кога Левандовски од пенал погоди и за комплетен пресврт. Три минути подоцна Рафиња се погрижи и за водство од два гола. По неколку неискористени прилики на двете страни Барселона во завршницата од првиот дел постигна и четврти гол, а стрелец беше Балде.

На самиот старт од второто полувреме се затресе стативата од голот на Барселона, додека казната стигна на спротивната страна, Рафиња постигна втор гол за 1:5.

Остана Барселона со играч помалку откако беше исклучен Шчесни во 56. минута, но веќе беше предноцна за Реал да направи некаков пресврт. Родриго до крајот погоди од слободен удар само за ублажување на поразот.